ALUA PASAMBAHAN DUDUAK

Sipangka:  Datuak Naro Sati
Si Alek    :  Datuak Marajo.

Datuak Naro Sati :
Assalamualaikum  WW

Ma nyo datuak Marajo.
Sungguahpun Datuak surang jo baduo nan taimbau,
dek awal kato nan sapatah,
tagak dek rundiang nan sabuah,
sambahlah datuak kasadonyo.

Niniak mamak jo panghulu,
nan gadang basa batuah,
andiko jo hulu balang ,
cadiak pandai alim ulamo,
nan mudo arih budiman,
bundo kanduang samo didalam,
dalam pasambahan ambo juo.

Adopun sambah nan ka dipasambahkan kaateh badan diri datuak,
tumbuah sarupo kini,
dan kato aleklah tibo,
kok alek lah sapanuah rumah,
jamuan lah sakorong kampuang,
tapi lah sonang hati niniak jo mamak,
santoso hati ibu jo bapo,
lah sonang bona hati kami.

Tapi lai dek kami nan marusuah,
tontangan ka duduakan datuak nan basamo.
Aluran diateh kok dibawah,
nan ditongah kok di topi,
patuik diujuang kok dipangka,
kok indak talotak pado tompeknyo,
kok indak sonang sejahtera.

Tagak dek pinta pinto kami,
minta ampun jo keredaan,
maaf diminta banyak-banyak,
itu nan marusuah dek badan kami,
diharok bunyi nak kumbali,
sakiannyo tuak...

Datuak Marajo    : Lah sampai dek datuak.
Datuak Naro Sati: Sakiro alah tuak.

Datuak Marajo :
Nan sapanjang kato datuak nan mandatang kapado kami,
tumbuah sarupo iko kini.
Dek kami nan ka jadi sauik jo saponyo taradok datuak nan basamo.

Indak kaditikam jajak,
ditikam jajak kok cupua,
di ulang kato kok batimbang,
ujuangnyo sajo kami ambiak,
diambiak sakiro ka baguno.
Nan bak andai kato datuak cako,
kan tontang kadudukan kami nan basamo ?

Aluran diateh kok dibawah
nan ditongah kok ditopi,
patuik diujuang kok dipangka,
kok indak talotak pado tompeknyo,
kan baitu bona ujuang parundiangan datuak ?

Datuak Naro Sati; Bona baitu tuak.

Datuak Marajo    :
Dek kami nan ka jadi sauik jo saponyo,
tumbuh sarupo iko kini,
Intan jo padi lah salancaran,
kilek comin lah mancayo,
kok sompik topek lapang pikiran
lah kewi juo adat adat dek kito tuak,
sakian sajo kasaponyo tuak,
pulang maklum pado datuak.